Hier findest du alle Texte unseres Debut-Albums. Am besten runterscrollen oder hier direkt drauf springen: Minibar-Pianist / Wieder la ga / Rosegarte / Chatz / Moosrose / Hut und Haar / Immerhin / Nid mis Problem / Hei / Bitternacht / Tango / Melancholie in Moll

Wo immer i chume - isch er scho da
und weiß mit wäm i wie lang wo bi gsy
er stellt keni Frage, wott nid wüsse warum
und wenn er‘s doch tuet - i stelle mi dumm

Syt Jahre spielt er das chlyne Lied
er kennt d‘Nacht und er weiss viel z‘viel
i syre Seel wohnt dr Süde
u wenn er möcht - er cha nid lüge

Er läbt ire Minibar
i sym Fach isch er e Star
er kennt jedes Lied u spielt vor sich hi
egal ob ich wyt wäg bi oder da bi
er isch dr Minibarpianist

er bruucht ke Schlaf und zieht sich nie um
versteht was i säge - o wenn i nid ma
er findet die Taste blind u stumm
chuum isch die Tür offe, isch wieder Tag

i mänge Nächt sing i mit ihm mit
für jede Luun het er dr passend Hit
syni Wält isch schwarz und wyss
läbt unger däm Dach aus Iis

Kuba Libre, Wodka Absolut
Pina Colada mit Zuckerhut
Martini Bianco, Prince of Wales
Bloody Mary, Sex on the Beach
Whisky Sour, Between the Sheets
Kir Royal, Bellini, Gin Fizz
Mojito, Campari, Sealed with a kiss

Wenn i di nomau lächle gseh, ännet em Strasserand
We de mir z'nächscht Mau Blicke schicksch, näbe am Zytigsstand

Tag für Tag anand verby, ghörsch scho fascht zu mir
Und ging wenn d'dini Zigi rouchsch hätt ig es Füür für di

Wenn i di mau würd gärn ha wie dass mi mis Härz würd la
Jalalalalalala du würdisch mi wohl gly wieder la ga

We mir's de mau versuecht hätt gha, mir wäre scho lang usenand
Hätte es brochnigs Härz, u d’s Glück rinnt üs derby us dr Hand

Tag für Tag zieht Zyt verby, Wunde heilt sie nid
Wunder gscheh, passiere tüe sie nume nid bi mir

Wenn i di mau würd gärn ha wie dass mi mis Härz würd la
Jalalalalalala du würdisch mi wohl gly wieder la ga
Instr. Ref.

I gseh üs tanze, i gseh üs bim tanze, mir tanze vor Nacht bis i Tag
Mir ghöre zäme, mir ghöre so zäme, vor luter Antworte kei Frag
Frag i di, trag i’s nid, nei cha nid ga
Frag mi doch, frag mi, doch nur we ds magsch ha

Wenn i di mau würd gärn ha wie dass mi mis Härz würd la
Jalalalalalala du würdisch mi wohl gly wieder la ga
Wenn i di mau würd gärn ha wie dass mi mis Härz würd la
Jalalalalalala du würdisch mi wohl gly wieder la ga
gly wieder la ga
gly wieder la ga

Am Mänti gan i ging ga Trämli fahre
Am Vieri Thé Citron im Casino
Am Zyschtig es Spaziergängli ar Aare
Es Schwätzli mitem Herr Valentino

Am Mittwuch nimm i d’Ysebahn i ds Wälschland
Schifflifahre ufem Murtesee
Dr Capitain, ging fründlich nimmt my Kusshand
Sy Charme isch bi de Dame ging gärn gseh

Doch ig, i mues no warte uf das Rendez-Vous im Rosegarte

Am Donnschti uf di Zähni chunnt dr Chauffeur
Galant het är mir d’Outotüre uf
Es Bsüechli isch drum nache bi mim Coiffeur
U mis Frisürli roubt dä Herre dr Schnuuf

Am Fritig promenieri mit em Schüpli
Es Büsi bruucht ja o mal früschi Luft
U hinderhär im Salon no es Cüpli
Dert styge d’Herre ab churz vor dr Gruft

Doch ig, i mues no warte uf das Rendez-Vous im Rosegarte

Am Samschti vor em Mirroir ab de viere
Unterstrych i Würdi und Galanz
När geit’s i ds Bellevue fürnähm ga diniere
Druf abe spielt dr Jackie uf zum Tanz

Doch ig, i mues no warte uf das Rendez-Vous im Rosegarte

I wirde ewig warte uf das Rendez-Vous im Rosegarte
oder zmingscht e Geburtstagscharte

DU hesch se gfunge u itz liegt’s bi dir
sich um se kümm’re – wär weiss, viellech schnurrt sie derfür
sie chunnt u sie geit wie d’Haar vo ihrem Fäu
sie räkelet sich i dire Dechi us weichem Flanäu

Sie spiut mit der Büti louft säute ir Mitti isch fründlech
Sie zeut dini Müsli u mordet se lisli u gründlech

Nei, sie ghört nid hie uf Bärn, doch du striichlisch se so gärn
Das weiss sie ganz genau – miau

Sie chraut sich dis Chüssi u thront arrogant
Sie frisst dr d’Haar vom Chopf, doch nie us dr Hand
Wosch du der se griife, fuucht sie: Läng mi nid a
Hesch du absolut e ke Zyt für sie, schliicht sie sich a

Sie gheit uf d’Pfote, sie spiut nid nach Note, sie sträubt sich
Du chasch se nid füere und o nid dressiere, es geit nid

U sie ghört nid zu dir uf Bärn, doch du striichlisch se so gärn
Das weiss sie ganz genau – miau

Moosrose us dr Migros u Klunker vom Coop
mit däm muess mir kene meh cho
spottbilligs Schmychle we se dr Haber sticht
Männer sy doch alli glych

bi mir zieht ke Buur meh syni Gummistifu ab
u macht sich i myre Chuchi breit
nid no mau steckt mir eine Blueme i d'Haar
u meint, I miech ihm när d'Wösch

u wenn öpper tschaupet bin I's
u wird öpper tschaupet bisch's du
u wenn öpper tschaupet bin I's
u wird öpper tschaupet bisch's du

lääri Verspräche u viel Lärm um nüt
we me öppis vo ne wott
de sy sie nid ir Lag oder eifach nid im Stand
me sött ne chüderle, me sött se püderle, sött nume da sy für sie

u wenn öpper tschaupet bin I's
u wird öpper tschaupet bisch's du
u wenn öpper tschaupet bin I's
u wird öpper tschaupet bisch's du

u kene gseht je wieder e Träne vo mir
mys Härz isch e Musku, es Spielzüüg isch's nid
u wenn I bis a mys Läbesänd alleini müesst sy
nomau so nes Bubi vertragen I nid

u wenn öpper tschaupet bin I's
u wird öpper tschaupet bisch's du
u wenn öpper tschaupet bin I's
u wird öpper tschaupet bisch's du

Mis h ärz isch schwär u truurig
es möcht zu dir drum truur ig
hesch de du das no nid gmerkt
i ghöre dir mit hut und haar

chum gloubt, dass du mi so versetzt hesch
ha gmeint i wär für di unersetzlich
wenn i das säge, de mein i's
i ghöre dir mit hut und haar

es cha doch nid sy
das darf doch nid wahr sy
dass du nid o öppis empfingsch
i chume nümm drus
es gseht fasch so us
gib mir doch nomau e versuech zum zeige

i miech dir's so schön u warm bi mir
du wettisch gar nümm furt vo mir
isch dir de das geng no nid klar?
i ghöre dir mit hut und haar

Immerhin git's Samschtigsjass
Chrützworträtsu, hölle Spass
Später ou no Wetten Dass
Immerhin, immer, immerhin

Immerhin nid spät no Krach
Öb am schlafe oder wach
Immerhin mi eiget Sach
Immerhin...?

D'Liebi
Isch nid meh aus es Wort
Ds Härz oder d'Seel
Sy doch nume ne Ort
D'Musig isch nümm
Meh aus e Stimm
Und e Akkord

Immerhin am Sunntig Znacht
d'Mueter het e Chueche gmacht
ab und zue für sie chly glacht
Immerhin, immer, immerhin

Immerhin e guete Ruef
Fründe und Erfolg im Bruef
Immerhin e guete Ruef!
Immerhin...?

D'Liebi
Isch nid meh aus es Wort
Ds Härz oder d'Seel
Sy doch nume ne Ort
D'Musig isch nümm
Meh aus e Stimm
Und e Akkord

Syt dir im Stress, loufts grad chly krass
Immer Agenda ou scho chly blass
Mir isch’s bequem – das isch nid mis Problem

Wiedermau hetze, u ja nüt verschwitze
Geng no chly meh, scho gly überhitze
Mir isch’s bequem – das isch nid mis Problem

Höcher, wyter – du ziehsch a mir verby
Schnäuer, lüter – bi leider nid derby

Immer am Bau, ke unglöste Fau
Mache lieber blau, dir chöit mir emau
Mir isch’s bequem – das isch nid mis Problem

Chumm Baby, bring mir dr Schmuus, I lose dir nid zue
Chumm Baby, sing no e Blues, mach d'Hose wieder zue
Immer wieder ds glychlige Gliir, s'nimmt langsam überhand
Herre wie du sy allerhand

Chumm Baby, mach nid so Sache, tue doch nid so dumm
Chumm Baby, mach nid so Krach, es isch mir grad nid drum
Immer wieder ds glychlige Gliir, s'nimmt langsam überhand
Dame wie i sy z'elegant

I weiss es gseht so us aus wär i hüt no frei
Aber am Ändi bini gar nid so allei
I mir Agenda het's no 2-3 Date frei
Hüt gani leider mit öpper angrem hei

Chumm Baby, bring mir dr Schmuus, das hesch schön güebt u glehrt
Chumm Baby, mir machts nümm us, ha’s hundert mau scho ghört
Immer wieder ds glyche Gliir, langsam schliifts e chly
Herre wie du sy nüt für mi

Chumm Baby, mach nid so Sache, das zieht ganz sicher nid
Chumm Baby, mach nid so Krach, da bruuchts chly meh bi mir
Immer wieder ds glyche Gliir, du fingsch di no toll
Dame wie i sy aschpruchsvou

I weiss es gseht so us aus wär i hüt no frei
Aber am Ändi bini gar nid so allei
I mir Agenda het's no 2-3 Date frei
Hüt gani leider mit öpper angrem hei

Ire stärneklare Nacht
Wenn dr Mond sys Liecht amacht
Hockt är am Tisch ellei am Znacht
Het är scho längscht es Füür entfacht
Und zellt wie mängisch är het glacht
Är fragt sich was dä Tag het bracht

Ire stärneklare Nacht
Wenn dr Mond sys Liecht amacht
Geit är i ds Bett und deckt sech zue
Doch findet är wie ging ke Rueh
Sys Härz isch schwär, es plaget ihn
d'Absänz vomene Läbensinn

Schlaf fingt är nur sälte no
Zwyfu heinim ds Tröime gno
Es nimmt ne mit, es hört nid uf
Es roubt ihm mängisch fasch dr Schnuuf
Dass Fähltritt wone Mönsch begeit
So Konsequänze nach sich treit

Ire stärneklare Nacht
Wenn dr Mond sys Liecht amacht
Isch d'Wahrheit mängisch wyter wäg
Aus öppis wome z'säge hätt
Dänkt är bi sich und nimmt der Huet
U ds Bett das färbt sich i sym Bluet

Denn wo sie sich zum erscht mau hei gseh
D'Juanita u dr Juan-José
Im Tanzlokal näb der Chirche us Stei
zum Glück isch d'Juanita no frei

Bim Tanze het är sie i d'Arme gno
Bim Tango sy sie zäme cho
Si näme ne Rum u tanze dür d'Nacht
Bis das der Tag erwacht

Dört wo d'Nacht nie ufhört, wo me d'Musig dür ds ganze Dorf ghört
Dört tanze sie wyter für immer, wärde sich nieme la ga / Tango wo nie ufhört

Körper sich biege u Bei sich aschmiege, dr Stolz wo sich spieglet im Gsicht
Ouge wo stäche, wo Härze bräche, dr Tango isch mi Liebesgschicht

U gly druf ir Chiuche säge sie ja
U lö sich druf nieme la ga
Am Abe im Dorf wird gfeschtet u glacht
Bis das der Tag erwacht

Dört wo d'Nacht nie ufhört, wo me d'Musig dür ds ganze Dorf ghört
Dört tanze sie wyter für immer, wärde sich nieme la ga / Tango wo nie ufhört

Dr Mond isch scho gly versunke
Und i bi gar nümm betrunke
Nüchtern isch die Wält doch himutruurig

Die Nacht isch scho gly verby
Geschter sy mir no zäme gsy
Allei isch die Wält doch himutruurig

Drum hol mi y - Melancholie
I wott versinke i mir Truurigkeit
Wott nümme dänke i mire Einsamkeit
löt mi la gränne bis mir besser geit
löt üs la sy - mi u d'Melancholie

Mis Härz isch uf Grund gloffe
i cha nid mau meh hoffe
Hüt isch d'Wält doch himutruurig

Drum hol mi y - Melancholie
I wott versinke i mir Truurigkeit
Wott nümme dänke i mir Einsamkeit
löt mi la gränne bis mir besser geit
löt üs la sy - mi u d'Melancholie

Dr Mond isch scho gly versunke
Und i bi gar nümm betrunke
Nüchtern isch die Wält doch himutruurig

Die Nacht isch scho gly verby
Geschter sy mir no zäme gsy
Allei isch die Wält doch himutruurig

Drum hol mi y - Melancholie
I wott versinke i mir Truurigkeit
Wott nümme dänke i mire Einsamkeit
löt mi la gränne bis mir besser geit
löt üs la sy - mi u d'Melancholie